موقع أبونا abouna.org - إعلام من أجل الإنسان | يصدر عن المركز الكاثوليكي للدراسات والإعلام في الأردن - رئيس التحرير: الأب د.رفعت بدر

الرئيسية /
روح وحياة
نشر السبت، ١٥ ابريل / نيسان ٢٠١٧
إلهي إلهي لماذا تركتني

نانسي شحاتيت :

كتيير انت بتتركنا يا الله
بعز المرض بتتركنا
بعز الضيق بتتركنا
بعز الاحزان بتتركنا
وبعز حاجتنا الك بتتركنا
وبتحكيلنا بعديها:
"لا تخافوا، ها أنذا معكم حتى انقضاء الدهر"
وينك؟
وينك ربي بلحظة الظلم؟
وينك ربي بلحظة القتل؟
وينك ربي بلحظة التعذيب؟
وينك يا ربنا بلحظة الارهاب الفكري والنفسي قبل الجسدي؟
وينك؟
وينك بلحظة الصلب والآلام؟
ووينك بلحظة صلاتنا؟
هلأ، ومع كل مشاهد الدم والأسى والفقر والوجع يلي ما عم بتنتهي ولا بتتغير
بالرغم من كل الصلوات والإبتهالات، بقدر أحزر انت وين؟
انت اصلاً حاكيلنا بس احنا ما فهمنا عليك لمّا حكيت
"مملكتي ليست من هذا العالم"
هلأ استوعبنا مزبوط شو يعني رجاؤنا مش على الأرض،
لأنه هون هالعالم مليان شرور لا يليق بالملوك وأبنائهم...
هلأ ومن زمان انت بملكوتك عم بتحضّر منازل سلام ونقاء ومحبة كثيرة...
بتحضرها للمساكين، للفقراء، للمرضى، للودعاء، للرحماء ولصانعي السلام...
انت مهّدت الطريق، هالطريق الضيق، طريق الآلام، وإحنا لازم نمشيه...
لأنك من قلت:
"إن لم تحمل صليبك وتتبعني، فلا تستحقني"
اليوم منستوعب انت وين...
بس يا الله حتى لو كنّا ما منستاهل وعالأغلب هيك،
ارحمنا نحن الخطأة، خطأة بس حاملين صليب...
إرحمنا على الأرض كما في السماء،
أذكرنا يا رب متى جئت في ملكوتك،
خليلنا مكان جنبك دائماً وابداً،
ولو كانت مساحة صغيرة كتير...